Асоцијацијата на „Lions“ клубовите започнала како сон на чикашкиот бизнисмен од областа на осигурувањето, Мелвин Џоунс, кој се прашувал зошто локалните бизнис клубови не можат да ги прошират своите хоризонти, и деловните прашања од личен интерес, не само кон своето туку и кон доброто на заедницата и пошироко. Идејата била прифатена во неговиот бизнис клуб во Чикаго и тој започнал со истражување и осмислување на соработката со други слични организации во САД.

 

На 7 јуни 1916 година е одржано основачко собрание на „Lions“ клубот и упатен е повик за одржување на национална конвенција во Далас. Во октомври истата година, делегатите од 22 клуба од девет американски држави го одобриле името на клубот, го избрале првиот претседател д-р Вилијамс Вудс, усвоиле статут, ги утврдиле симболите, и етичкиот кодекс на лајонизмот.

 

Здружението се проширило и добило меѓународен карактер. Во 1927 година веќе броело 60.000 членови организирани во 1183 клубови. Лајонизмот стасал во Европа во 1948 година, преку Шведска, Швајцарија и Франција. Првиот „Lions“ клуб во Јапонија започнал да дејствува во 1952 година. Во источна Европа првите клубови се формирани во 1989 година, во Полска, Унгарија и Естонија, во Русија во 1990, а во Македонија во 1997. Асоцијацијата станала Интернационална во вистинската смисла на зборот со над 40.000 клубови во повеќе од 180 земји и со над 1.4 милиони членови низ светот.

 

„Lions“ клуб Вардар е член на најголемата и најефикасната хуманитарна организација во светот, која независно од јазикот на кој говорат нејзините членови, религијата на која и припаѓаат и политиката за која се определени, е целосно посветена на тоа да им помогне на оние на кои им е потребна помош.